情深的雞珍 - 源自昨日明報

陳馮富珍與夫訂來世鴛盟 　【明報專訊】香港1997年首爆禽流感期間，因為話自己日日都食雞而畀人起咗「雞珍」花名嘅陳馮富珍，如今已榮升世衛總幹事，又撞正甲型H1N1流感爆發，今回生肖屬豬嘅珍姐咪變做「豬珍」？Emily噚日睇咗一篇《英國衛報》嘅陳太訪問，內容有軟有硬，其中最搞嘢嘅，係陳太盼與老公來生再遇嘅一段。 　話說雞珍自從坐上世貿總幹事一職後，自然要長駐瑞士日內瓦，但佢老公為免無所事事，加上雞珍經常要周遊列國，所以就無去日內瓦陪老婆大人。結果嘛，雞珍就一個人去日內瓦闖天下。 　老公做「家庭煮夫」 　訪問中，珍雞話自己住喺距離世貿總部5分鐘步程嘅地方，每天可以行路返工，連車都唔使揸。佢仲笑住話，由於佢初初法文都唔識多句，所以喺日內瓦走入舖頭，言語不通，結果想問人邊度有罐頭刀買都問唔到。雞珍話，嫁畀老公30年來，都係由夫婿做「家庭煮夫」，搞到佢已經忘記咗點樣揸鑊鏟，無啖好食，駐日內瓦一段時間後，直頭覺得自己有貧血𠻹。 　講到老公，雞珍直頭標眼水，同記者話﹕「對唔住！……我一講起我老公就……你知道嘛，佢係一個好鬼有趣和可愛嘅男人。」佢仲自爆同老公嘅一段肉麻對話，雞珍話，佢曾經問老公﹕「David，我可唔可以有份合同？」佢老公一頭霧水，問番佢「你乜意思呀？」，雞珍就話﹕「下世我可唔可以再嫁畀你？」噢！夠晒情深